უკრაინაში საქართველოს ელჩი საგარეო საქმეთა სამინისტროში დაიბარეს. ოფიციალური კიევი განმარტებებს ითხოვს უკრაინის მოქალაქისა და პრეზიდენტის მრჩეველთა საბჭოს წევრის დაპატიმრების გამო.
შეგახსენებთ, მიხეილ სააკაშვილი 1 ოქტომბერს, საღამოს საათებში, თბილისში დააკავეს. მანამდე, მესამე პრეზიდენტმა გაავრცელა ვიდეომიმართვა, რომელიც ბათუმში იყო გადაღებული. საქართველოს ხელისუფლების წარმომადგენლები მთელი დღის განმავლობაში აცხადებდნენ, რომ მიხეილ სააკაშვილი საქართველოში არ არის. ნაშუადღევს “ქართული ოცნება” აცხადებდა, რომ თითქოსდა ბათუმში ჩაწერილი ვიდეო ფეიკია და ის უკრაინის კურორტ ტრუსოვიცკეში იმყოფება.
მოგვიანებით, საქართველოს პრემიერმინისტრმა საგანგებო ბრიფინგი გამართა და განაცხადა, რომ მიხეილ სააკაშვილი დაკავებულია. საქართველოს მესამე პრეზიდენტი ამ დროისთვის რუსთავის სასჯელაღსრულების დაწესებულებაში იმყოფება.