“კი, ის ნამდვილად ბათუმშია, ზუსტად ვიცი და ხვალ, რვა საათსა და 5 წუთზე მიხეილ სააკაშვილს ოფიციალურად გამოვაჩენთ”, – ამის შესახებ მურმან დუმბაძემ ტვ “პირველის” ეთერში, ბათუმიდან ჩართვის დროს განაცხადა, როცა უპასუხა შეკითხვას, სად იმყოფება ამჟამად საქართველოს მესამე პრეზიდენტი მიხეილ სააკაშვილი.
მისი თქმით, მიხეილ სააკაშვილს არ შეხვედრია, მაგრამ რამდენიმე საათში შეხვდება, ისევე როგორც ბევრი სხვა მოქალაქე.
“რომელი შსს ეძებს, ვინაა მინისტრი, გომელაური?” – ასე გამოეხმაურა მურმან დუმბაძე ჟურნალისტის ფრაზას იმასთან დაკავშირებით, რომ შსს მიხეილ სააკაშვილს ეძებს.
შეგახსენებთ, მას შემდეგ, რაც მიხეილ სააკაშვილმა ბათუმიდან ორი ვიდეომიმართვა გაავრცელა, ზუგდიდიდან ბათუმის მიმართულებით სპეცრაზმი და ჯავშანტექნიკა გადაისროლეს, ხოლო საქართველოს ხელისუფლების წარმომადგენლები ერთმანეთის მიყოლებით აცხადებენ, რომ საქართველოს მესამე პრეზიდენტი საქართველოში არ არის.
რაც შეეხება ჯავშანტექნიკას, შსს-მ საგანგებო ბრიფინგზე განაცხადა, რომ ეს ყოველდღიური გადაადგილება და არ უკავშირდება მიხეილ სააკაშვილის საქართველოში შესაძლო დაბრუნებას.