მთავარი არხის” გენერალური დირექტორი, ნიკა გვარამია გადაცემაში “მთავარი აქცენტები” IPSOS GLOBAL-ის კვლევის შედეგები გაანალიზა, რომლის მიხედვითაც, კითხვაზე – რომელ პარტიას მისცემდით ხმას, ხვალ რომ თვითმმართველობის არჩევნები ტარდებოდეს? მოქალაქეების მხოლოდ 35% ამბობს, რომ მხარს “ქართულ ოცნებას” დაუჭერდა.

ნიკა გვარამია ამბობს, რომ ” ქართული ოცნება” არათუ გადალახავს შარლ მიშელის დოკუმენტით განსაზღვრულ 43%-ს, არამედ ვერც კი უახლოვდება ამ ნიშნულს, რაც ნიშნავს იმას, რომ რეფერენდუმი “ოცნებისთვის” იქნება დამარცხების მომტანი.

“გარანტირებულად შეგვიძლია ვთქვათ, რომ საქართველოში 43%-იან ბარიერს “ქართული ოცნება” ვერც მიაღწევს, არათუ გადალახავს. ყველა მანიპულაციის გათვალისწინებით: მოსყიდვებით, რომელიც უკვე დაიწყო. ხატზე დაფიცების გამოყენებით, ეს საერთოდ არ ვიცი რა ტოტემიზმია, ასეთ რამეს თუ ვინმე იყენებს მსოფლიოში, მაგრამ მე პირადად მაქვს ინფორმაცია, რომ სამეგრელოში არის მასობრივი ხატზე დაფიცებით პირობის მიცემა, რომ მისცემენ ხმას ოღონდ ჯერ ფულს რომ იღებ და შემდეგ ხატზე იფიცებ ეს როგორ შეესაბამება ერთიმეორეს არ ვიცი. არის კიდევ ცნობილი ქურდების საფლავებზე დაფიცება, წარმოუდგენელი რამ ხდება, მაგრამ “ოცნება” ამ მანიპულაციებითაც კი 43%-ს ვერ უახლოვდება. აქ შედის, რა თქმა უნდა, ადმინისტრაციული რესურსიც”,- ამბობს ნიკა გვარამია.