შეერთებული შტატები აპირებს, რომ განვითარებადი ქვეყნებისთვის Pfizer-ის ვაქცინის 500 მილიონი დოზა გამოყოს.

დამატებითი დოზების გაცემის შემდეგ, აშშ-ს საერთო ჯამში, მილიარდი დოზა ექნება გაცემული. BBC-ის ცნობით, ექსპერტების თქმით, იმისთვის, რომ მსოფლიო მოსახლეობის მინიმუმ 70% აიცრას, 11 მილიარდი დოზაა საჭირო.

ჯანმრთელობის მსოფლიო ორგანიზაციის მიზანი იყო, რომ თითოეულ ქვეყანაში 40%-იანი აცრის მაჩვენებელი ყოფილიყო. თუმცა, როგორც BBC წერს, მიზნის მიღწევა ნაკლებად სავარაუდოა.

ოქსფორდის უნივერსიტეტის მონაცემების თანახმად, მაშინ, როცა მაღალშემოსავლიან ქვეყნებში მოსახლეობის ნახევარს ერთი დოზა მაინც აქვს მიღებული, დაბალშემოსავლიან ქვეყნებში, მოსახლეობის მხოლოდ 2%-ა ერთი დოზით აცრილი.