საქართველოში მოქმედი ფსიქიკური ჯანმრთელობის დარგში მომუშავე პროფესიული ასოციაციები სუს-ს მხრიდან ფსიქიკური სერვისების შესაძლო მოსმენაზე შეშფოთებას გამოხატავენ და ერთობლივ განცხადებას ავრცელებენ.
ხელმომწერი ორგანიზაციები ხელისუფლებას მოუწოდებენ – აღკვეთოს მოსმენების უკანონო და მანკიერი პრაქტიკა, გაანადგუროს არსებული ჩანაწერები, გამოიძიოს ამ პრობლემის ფესვები და მოახდინოს ცვლილებები.
“გავრცელებული ინფორმაციის თანახმად, შესაძლოა ქვეყანაში ისმინება და შესაბამისად, არ არის დაცული ფსიქიკური ჯანმრთელობის სერვისების – ფსიქოლოგიური კონსულტირების, ფსიქოთერაპიის, ფსიქიატრიული დახმარების – უსაფრთხოება. ეს დიდ ზიანს აყენებს იმ ადამიანებს, ვინც დახმარებისთვის მიმართავს შესაბამის მომსახურებასა და სპეციალისტებს, და შესაძლოა ტრაგიკულ შედეგებამდე მიგვიყვანოს. ეს, ასევე, ზიანს აყენებს ზოგადად ფსიქოლოგიური და ფსიქიატრიული დახმარების საქმეს, რამდენადაც ფსიქიკური ჯანმთელობის მომსახურების საბაზო ეთიკური წესების განხორციელებს შეუძლებელს ხდის.
ეს არაჯანსაღი პრაქტიკა კონფლიქტშია კანონთან პირადი ცხოვრების ამსახველი ინფორმაციის ან პესონალური მონაცემების ხელყოფა და ზოგადად ადამიანის უფლებების კონვნენციასთან”, – წერია განცხადებაში.
ხელმომწერი ასოციაციები და ორგანიზაციები:
GIP გლობალური ინიციატივა ფსიქიატრიაში
GCRT წამების მსხვერპლთა ფსიქოსოციალური და სამედიცინორეაბილიტაციის ცენტრი
საქართველოს ფსიქიატრთა საზოგადოება
GABP საქართველოს სხეულზე ორიენტირებული ფსიქოთერაპიის ასოციაცია
საქართველოს იმდიარ საზოგადოება
სუპერვიზიის და კონსულტირების საქართველოს საზოგადოება
ხელმომწერი ორგანიზაციების სია განახლებადია.
ცნობისთვის, 13 სექტემბერს, ინტერნეტსივრცეში ფარული მიყურადების შესახებ მორიგი ინფორმაცია გავრცელდა. ჩანაწერები 2014-2021 წლებს მოიცავს. ჩანაწერების მიხედვით უსმენდნენ სასულიერო პირებს, პოლიტიკოსებს, ჟურნალისტებს თუ სხვა. გამოქვეყნებულ ფაილებში ასახული საუბრების შინაარსი მოქმედი პირების ნაწილმა უკვე დაადასტურა.
ამავე თემაზე და სუს-ში მოქმედ სქემაზე ნიკა გვარამიას “მთავარ აქცენტებში” უწყების მოქმედმა თანამშრომელმა ისაუბრა. მან დაადასტურა, რომ სუს-ს არაერთი თანამშრომელი ჰყავს, რომლებიც კონკრეტული ინტერესის მიხედვით პოლიტიკოსებს, ჟურნალისტებს, ექიმებს, ფსიქოლოგებს, ფსიქიატრებს სასულიერო პირებს თუ სხვა სფეროში დასაქმებულებს უსმენს.