აშშ-ს კონგრესში არსებობს ინიციატივა, გაიზარდოს აშშ-ს მიერ უკრაინის მხარდაჭერა, კერძოდ კი ცვლილებები შევიდეს 2022 წლის თავდაცვის კანონპროექტში, რაც ბაიდენის ადმინისტრაციას დააკისრებს უკრაინას საჰაერო თავდაცვის სისტემები მიჰყიდოს ან გადასცეს, მათ შორის, შესაძლოა, რკინის გუმბათის საჰაერო თავდაცვის სისტემა, რომელიც ამჟამად აშშ-ს არმიას აქვს. – წერს ამერიკული მედია Politico.

2022 წლის თავდაცვის პოლიტიკის კანონპროექტის კონგრესის შეიარაღების სამსახურის კომიტეტის ვერსიაში გაწერილია პუნქტი, რომელიც პენტაგონისგან მოითხოვს, კონგრესს წარუდგინოს დეტალური ანგარიში, რომელშიც გაწერილი იქნება უკრაინისთვის ისეთი სისტემების მიყიდვის ან გადაცემის შესაძლებლობა, რომლებიც უახლოეს მომავალში არ იქნება გამოყენებული აშშ-ს მიერ.

რკინის გუმბათი ისრაელში 2011 წლის შემდეგ გამოიყენება. ის კომპანიების Rafael-ისა და Raytheon-ის მიერ არის შემუშავებული და მოკლე მანძილის რაკეტების წინააღმდეგ ერთ-ერთი ყველაზე ეფექტიანი თავდაცვის სისტემაა. ისრაელის სამხედრო ძალების თანახმად, ბოლო წლების განმავლობაში რკინის გუმბათმა ისრაელის მიმართულებით გასროლილი რაკეტების 90% გაანეიტრალა.

როგორც Politico წერს, რომ აშშ-ს რკინის გუმბათის ორი გამშვები ბატარეა შეიძინა, რომლის გამოყენების დაწყებაც მომავალი წლიდან იგეგემება, მაგრამ არმიას პრობლემები შეექმნა სისტემის ინტეგრირების პროცესში. რკინის გუმბათის დიზაინი აშშ-ს არმიის ახალი საკონტროლო სისტემებისთვის არ არის შემუშავებული, რაც საჭიროების შემთხვევაში მათ საზღვრებს გარეთ გამოყენებას ართულებს.

გამოცემის თანახმად, 2022 წლის თავდაცვის კანონპროექტის წარმომადგენელთა პალატის კომიტეტის ვერსია, არ აზუსტებს, კონკრეტულად რა შეიარაღება უნდა გადაეცეს უკრაინას, მაგრამ კონგრესის თანამშრომლის თქმით, საუბარი არსებულ სისტემებზე, მიანიშნებს, რომ ყველაზე მოსალოდნელია უკრაინას სწორედ რკინის გუმბათის გამშვები ბატარეები გადაეცეს.

ბოლო თვეებში, უკრაინის ხელისუფლება აჩვენებს, რომ მზადაა შეიარაღების გაძლიერებას მეტი ყურადღება დაუთმოს. მაისში უკრაინის ხელისუფლებამ გამოაცხადა, რომ თავდაცვის ყოველწლიურ ბიუჯეტს გაზრდის. უკრაინის თავდაცვის მინისტრის ანდრეი ტარანის თქმით, მისი სურვილია გაზრდილი ბიუჯეტის ნაწილი საჰაერო თავდაცვის ახალ სისტემებზე, მათ შორის, შესაძლოა, რკინის გუმბათზეც დახარჯოს.

Politico აღნიშნავს, რომ კიევის სურვილი ვაშინგტონში უყურადღებოდ არ დარჩენილა.