პარტია საქართველოსთვის თავმჯდომარე და თბილისის მერობის კანდიდატი, გიორგი გახარია ამბობს, რომ ნარკოტესტს ევროპაში, საერთაშორისო ლაბორატორიაში გაიკეთებს, რადგან მისი თქმით, აქვს ინფორმაცია, რომ მის წინააღმდეგ ნარკოტესტთან დაკავშირებით პროვოკაცია მზადდებოდა.
“ჩვენ გვაქვს უტყუარი ინფორმაცია პირდაპირ სამხარაულის ეროვნული ბიუროდან, რომელიც მზადდებოდა ოცნების ბოსების მიერ დაგეგმილ ტესტირებასთან დაკავშირებით და უნდა გამეკეთებინა მე. იმისთვის რომ არ მივცეთ ასეთი სპეკულაციების გაგრძელების შესაძლებლობა მე არ გავიკეთებ ამ ტესტს კომერციულ ლაბორატორიებში, არამედ გადავდგამთ იმ ნაბიჯს ჩვენს გუნდთან ერთად თათბირის შემდეგ, დავკარგავთ ერთ უაღრესად მნიშვნელოვან საარჩევნო დღეს, გავფრინდებით ევროპაში, საერთაშორისო ლაბორატორიაში სადაც ჩავიტარებთ თმის ანალიზს, რომელიც არის ყველაზე უტყუარი. ანალიზის პასუხი იქნება ორ კვირაში და რა თქმა უნდა იქნება საჯარო”.- ამბობს გიორგი გახარია.
შეგახსენებთ, დედაქალაქის მერმა და ქართული ოცნების მერობის კანდიდატმა, კახა კალაძემ სამხარეულოს ეროვნულ ბიუროში ტესტი 6 სექტემბერს ჩააბარა და სხვა კანდიდატებსაც მოუწოდა.