“ჩემმა მეუღლემ დამირეკა ორი დღის წინ, ძალიან ცუდად ვარ, სუნთქვა მიჭირსო. შეიძლება ისევ საავადმყოფოში გადამიყვანონო, გეგუთშიც დაფიქსირდა, მაგრამ არ იძახიან. ძალიან ვნერვიულობთ, ქსანშიც დაფიქსირდა, მაგრამ ყველა უარყოფს. ტელეფონში რომ თქვან, სჯიან ან პაემნის უფლებას არ აძლევენ, ან ტელეფონზე დარეკვის”, – ამბობს ფორმულასთან საუბრისას ერთ-ერთი პატიმრის ცოლი.
მძიმე ეპიდემიური ვითარებაა ქუთაისის ციხეშიც. ადვოკატების ინფორმაციით, ქუთაისის #2 ციხეში 14 დაინფიცირებული პატიმრის მდგომარეობა იმდენად მძიმე იყო, რომ თბილისის საავადმყოფოში გადაიყვანეს. ადვოკატები ხელისუფლებას ქმედითი ნაბიჯების გადადგმისკენ მოუწოდებენ.
ჯანდაცვის მინისტრის პირველი მოადგილე თამარ გაბუნია ადასტურებს, რომ გეგუთის პენიტენციურ დაწესებულებაში კორონავირუსით ინფიცირების 8 შემთხვევა დადასტურდა.
“გეგუთის შემთხვევაში, ნამდვილად დაფიქსირდა თავდაპირველად ერთი შემთხვევა. საკარანტინე სივრციდან გადაყვანილი პირი გაიტესტა რამდენჯერმე, თუმცა ორი ტესტირების შედეგად პასუხი არ დადასტურდა და მხოლოდ მესამე ტესტირების შემდეგ მოხდა დიაგნოზის დადასტურება და ის თანამესაკნეებთან ერთად უსიმპტომოა. ყველა გადაყვანილია სამოქალაქო სექტორის შესაბამის სივრცეში”,- ამბობს გაბუნია.
ამასთან ჯანდაცვის მინისტრის მოადგილე ამბობს, რომ გეგუთის გარდა, სხვა პენიტენციურ დაწესებულებებში ვირუსის არსებობა არ დადასტურებულა.