აშშ-ს პრეზიდენტი, ჯო ბაიდენი აპირებს, რომ აშშ-ს საევაკუაციო მისია ავღანეთში ამჟამინდელ ბოლო ვადამდე, 31 აგვისტომდე დაასრულოს. თუმცა, მან გასცა განკარგულება, რომ პენტაგონმა და სახელმწიფო დეპარტამენტმა იმუშავონ დამზღვევ გეგმაზე, თუკი 31 აგვისტომდე ევაკუაციის დასრულება ვერ მოხერხდება.
“რაც უფრო მალე დავასრულებთ, მით უკეთესი. [საევაკუაციო] ოპერაციების ყოველ დღეს ჩვენი სამხედროების მიმართ საფრთხე იზრდება” – თქვა პრეზიდენტმა ბაიდენმა.
ბაიდენის თქმით, ევაკუაციის დროულად დასრულება თალიბანზეა დამოკიდებული და დაჯგუფებამ პროცესს ხელი არ უნდა შეუშალოს. სწორედ ამიტომ, პენტაგონი და სახელმწიფო დეპარტამენტი დამატებით გეგმაზე იმუშავებენ.
ამ ეტაპისთვის ავღანეთიდან 70 000-მდე ადამიანის ევაკუაცია შეძლეს.