ყველასთვის და, განსაკუთრებით უფროსი თაობის წარმომადგენლებისთვის კარგად ცნობილი “ბოლოკა”- მსახიობი და იურისტი გოჩა ლომია 69 წლისა გარდაიცვალა. სამძიმრის წერილს საქართველოს კულტურის, სპორტისა და ახალგაზრდობის სამინისტრო ავრცელებს და უსამძიმრებს მის ოჯახსა და ახლობლებს.
“ღიმილის ბიჭებში” შესრულებული, საყოველთაოდ ცნობილი როლის გარდა, გოჩა ლომია ასევე მონაწილეობდა რეზო ჩხეიძის ფილმში “ნერგები” და თემურ ფალავანდიშვილის ფილმში “მოხეტიალე რაინდები”.
“როგორც თავად იხსენებდა, 15 წლის იყო, როდესაც “ღიმილის ბიჭებს” შორის, შემთხვევით აღმოჩნდა. “მიმიყვანეს პიონერთა სახლში. თუ განათლების დარგში ვინმე რამეს წამოადგენდა რაიონის მასშტაბით, ყველა იქ დამხვდა თავმოყრილი. კინოში გადაღება გინდაო? – მკითხეს. ეგ ვის არ უნდა-მეთქი, ვუპასუხე. აბა, ლექსი წაგვიკითხეო. ლექსს ვერა და თუ გინდათ, ანეკდოტს მოგიყვებით-მეთქი, გამოვუცხადე და მოვხსენი გუდას პირი. ჯერ იცინეს, მერე სიცილისგან იტირეს…
ამ დღიდან 2 კვირის თავზე, თბილისში ჩამოვედი, სინჯებზე. კახა ქორიძესთან ერთად ჩამაწერინეს რამდენიმე სცენა და მალევე მახარეს, როლზე დაგამტკიცესო. დაჯერება მიჭირდა, სიხარულისგან დავფრინავდი” ….
გოჩა ლომიას გარდაცვალება დიდი დანაკლისია ქართული საზოგადოებისა და ქართული კინოსთვის.”- ნათქვამია კულტურის სამინისტროს გავრცელებულ სამძიმრის წერილში.