ნაციონალური მოძრაობის ერთ-ერთი ლიდერი ხატია დეკანოიძე საქართველოში აშშ-ის ყოფილი ელჩის, იან კელისა და ფლორიდის საერთაშორისო უნივერსიტეტის მკვლევარის, დევიდ კრამერის წერილს საგანგაშოს უწოდებს, მისი თქმით, სტატიაში კარგად ჩანს, რომ საქართველო ახლა უმნიშვნელოვანეს გზაგასაყარზე დგას.
“სტატია, რომელიც უკავშირდება პრიდაპირ საქართველოს ხელისუფლების მიერ პროდასავლური კურსის ცვლილებას და რუსულ ორბიტაზე კვლავ მობრუნებას, არის საგანგაშო და იქ ჩამოთვლილი ფაქტები ყველა, ძალადობა, ხელისუფლების მიერ ძალაუფლების ჩაჭიდება, ოლიგარქიული რეჟიმი, ჟურნალისტებისა და ოპოზიციის დევნა, ეს ყველაფერი არის იმის მაჩვენებლი, თუ რა უმნიშვნელოვანეს გზაგასაყარზე დგას ქვეყანა”, — განაცხადა მან.
20 აგვისტოს იან კელიმ და დევიდ კრამერმა The Foreign Policy-ში წერილი გამოაქვეყნეს სახელად —საქართველო ზურგს აქცევს დასავლეთს. ისინი აკრიტიკებენ მმართველ გუნდს რიგი გადაწყვეტილებებისა, თუ განცხადებების გამო და ამბობენ, რომ ქართული ოცნება თბილისს მოსკოვის ორბიტაზე აქცევს, როცა დემოკრატიულ ინსტიტუციებს შლის.