ჰაიტიზე მიწისძვრის შედეგად გარდაცვლილთა რიცხვი 1 941-მდე გაიზარდა,- ინფორმაციას Reuters-ი ავრცელებს.

ამასთან, მიწისძვრის შედეგად დაშავებულია 9 900-ზე მეტი ადამიანი.

სამაშველო სამუშაოები გუშინ ტროპიკული შტორმის შედეგად გამოწვეული ძლიერი წვიმისა და წყალდიდობის გამო დროებით შეჩერდა, თუმცა მოგვიანებით ისევ განახლდა და მაშველები ნანგრევებში მოყოლილი და დაკარგული პირების ძებნას განაგრძობენ.

მიწისძვრამ რამდენიმე დიდი საავადმყოფო დაანგრია ან მნიშვნელოვნად დააზიანა, რის გამოც ექიმებს კუსტარულად მოწყობილ კარვებში უწევთ დაშავებულებისთვის სამედიცინო დახმარების გაწევა.

ის ადამიანები, რომლებიც მიწისძვრას გადაურჩნენ, საკვებს, თავშესაფარსა და სამედიცინო დახმარებას ითხოვენ.

ჰაიტიზე საკვები, მედიკამენტები და სხვა მარაგები გააგზავნეს ვენესუელამ, ჩილემ, მექსიკამ, პანამამ, კოლუმბიამ, დომინიკელთა რესპუბლიკამ. ქვეყანას საჭირო მარაგებით და სამძებრო-სამაშველო ჯგუფებით დაეხმარა შეერთებული შტატებიც.

ჰაიტიზე 7.2 მაგნიტუდის სიმძლავრის მიწისძვრა შაბათს მოხდა.