ზუგდიდში, სამხარეო ადმინისტრაციის შენობის წინ, ტროტუარზე, ღამის საათებში “ლელოსა” და მოძრაობა “დროას” სამეგრელოს ორგანიზაციათა ლიდერებმა თამარ ბელქანიამ და მარიამ სიჭინავამ ხსოვნის აქცია გამართეს.
მათ სამხარეო ადმინისტრაციის წინ, სახელმწიფო დროშის დაშვების შემდეგ, მავთულხლართი გაჭიმეს და მავთულხლართებზე 2008 წლის რუსეთ-საქართველოს ომის ამსახველი, ასევე ამ ომში დაღუპული საქართველოს მოქალაქეების, მებრძოლების სია და ფოტოები გამოფინეს.
“აქ არიან ის ადამიანები, რომლებიც 2008 წელს იბრძოდნენ და რომელთა თავგანწირვის შედეგია ის, რომ ჩვენ ახლა ვდგავართ აქ”, – თქვა “ლელოს” ადგილობრივმა ლიდერმა თამარ ბელქანიამ.
“თუ ადგილობრივ ხელისუფლებას მართლაც აღელვებს ოკუპაცია და ის, რაც 2008 წლის აგვისტოში მოხდა, ამ ფოტოებს ხელი არ უნდა ახლოს”, – დაამატა “დროას” ადგილობრივმა ლიდერმა მარიამ სიჭინავამ.
