პრემია “ლიტერა მთარგმნელთათვის” წელს აღარ ჩატარდება. ამის შესახებ ინფორმაციას “მწერალთა სახლი” ავრცელებს. პრემია 2020 წელს “მწერალთა სახლის” ინიციატივით დაარსდა და იგი საქართველოს განათლების, მეცნიერების, კულტურისა და სპორტის სამინისტროს მიერ დაფინანსდა.
“ლიტერატურული პრემია “ლიტერა” და მთარგმნელობითი პრემია “ლიტერა მთარგმნელებისთვის“” კულტურის, სპორტისა და ახალგაზრდობის სამინისტროს მიერ ფინანსდება სამინისტროს მიერ დამტკიცებული პროგრამის “კულტურის ხელშეწყობა” ფარგლებში ერთიან პროექტად და სამინისტროს პოზიციაა, განიხილოს ორივე პრემიის ჩატარება ერთიან ჭრილში, შესაბამისად, ლიტერატურული კონკურსი “ლიტერა მთარგმნელებისთვის 2021″ ვეღარ გაიმართება”, – წერია განცხადებაში.
ცნობისთვის პრემია “ლიტერა” მწერლების, პოეტებისა და ჟიურის წევრების პროტესტის შემდეგ ჩაიშალა. კონკურსში მონაწილე პირთა აბსოლიტურმა უმრავლესობამ მონაწილეობაზე უარი ორი მიზეზით თქვა – კულტურის მინისტრ თეა წულუკიანის გამო, და ამ მინისტრის მიერ ჟიურიში საკუთარი სურვილით ერთი წევრის დანიშვნის.