გაეროს უშიშროების საბჭომ, დახურულ სხდომაზე, საქართველოს ოკუპირებულ რეგიონებში არსებული ვითარება განიხილა.
სხდომის დასრულების შემდეგ უშიშროების საბჭოს ქვეყნებმა: აშშ-მ, დიდმა ბრიტანეთმა, ირლანდიამ, ნორვეგიამ, ესტონეთმა და საფრანგეთმა ერთობლივი განცხადება გამოაქვეყნეს. განცხადებას უერთდება საბჭოს მომავალი წევრი ქვეყანაც – ალბანეთი. საქართველოს ტერიტორიული მთლიანობისა და სუვერენიტეტის მხარდასაჭერ განცხადებას ასევე შეუერთდა უკრაინის მისია გაეროში.
გაეროს უშიშროების საბჭოს წევრი ქვეყნები განცხადებაში კვლავ გამოთქვამენ საქართველოს ტერიტორიული მთლიანობისა და სუვერენიტეტის ურყევ მხარდაჭერას. ასევე გმობენ რუსეთის პროვოკაციებს, როგორიცაა საქართველოს მოქალაქეთა გატაცება, სამხედრო წვრთნები ოკუპირებულ რეგიონებში, ადმინისტრაციული საზღვრის ჩაკეტვა, ე.წ. ბორდერიზაცია, ეთნიკური ქართველების დისკრიმინაციას გალსა და ახალგორში, ქმედებები, რომლებიც პანდემიის მიუხედავად არ შეწყვეტილა. გაეროს უშიშროების საბჭოს ქვეყნები რუსეთის ფედერაციას მოუწოდებენ გაათავისუფლონ უსამართლოდ დაკავებული ირაკლი ბებუა და საქართველოს სხვა მოქალაქეები.
გაეროს უშიშროების საბჭო გამოთქვამს წუხილს, რომ საქართველოს ოკუპირებულ ტერიტორიებში ვერ ხერხდება ჰუმანიტარული მდგომარეობის კონტროლის მონიტორინგის შეუზღუდავი მექანიზმების დაშვება.
უშიშროების საბჭოს ქვეყნებმა ახსენეს 2021 წლის იანვარში, სტრასბურგის ადამიანის უფლებათა სასამართლოს მიერ მიღებულ გადაწყვეტილება, რომლის მიხედვითაც, რუსეთის ფედერაციას, როგორც სახელმწიფოს, რომელიც ახორციელებს ოკუპირებული რეგიონების ეფექტურ კონტროლს, ეკისრება პასუხისმგებლობა აქ ჩადენილ ადამიანის უფლებათა მძიმე დარღვევებზე.