შესაძლოა, სპორტის სასახლეში საველე ჰოსპიტალი გაიხსნას, – ინფორმაციას საკთარ, კარგად ინფორმირებულ წყაროზე დაყრდნობით “მთავარი არხი” ავრცელებს. ჯანდაცვის სამინისტროში ამ ინფორმაციას არ ადასტურებენ, არაფერი იციან სპორტის სასახლის დაცვის წევრებმაც – ისინი ამბობენ, რომ არ იციან, მიმართა თუ არა ადმინისტრაციას ჯანდაცვის სამინისტრომ.

კატასტროფული მდგომარეობაა კლინიკებში. მაგალითად, ერთერთ კლინიკაში არსებული 200 კოვიდსწოლიდან 195 უკვე დაკავებულია, მსგავსი სიტუაციაა პედიატრიულ კლინიკებშიც.

“ჩვენთან 160 საწოლია, რომელიც, ფაქტობრივად, შევსებულია, ასეთივე მდგომარეობაა რეანიმაციის განყოფილებაში. ბოლო დღეების განმავლობაში გაიზარდა კოვიდპაციენტების მომართვიანობა საქართველოშიც და ჩვენს კლინიკაშიც მსგავსი სურათია”, – ამბობს ზურა ჩხაიძე, კლინიკა “ვივამედის” მენეჯერი.

შეგახსენებთ, დღეს კორონავირუსით გარდაცვლილთა რაოდენობამ პანდემიის დაწყებიდან დღემდე რეკორდულ მაჩვენებელს მიაღწია – გარდაცვლილია 38 ადამიანი. მათი თითქმის 100% აუცრელი იყო.