მსოფლიოს სხვადასხვა ქვეყანაში გაჩენილი ტყის ხანძრებისგან დაზარალებული ქვეყნების სიას საბერძნეთიც დაემატა, სადაც რამდენიმე დასახლებულ პუნქტთან ახლოს ტყეებში, ხანძრები მძვინვარებს. მოხდა რამდენიმე დასახლებული პუნქტის ევაკუაციაც.

საბერძნეთში საქართველოს საელჩო საქართველოს იმ მოქალაქეებს აფრთხილებს, რომლებიც ამ მომენტისთვის საბერძნეთში იმყოფებიან.

“ძვირფასო თანამემამულეებო! ამჟამად ჩრდილოეთ ატიკაში მიმდინარე ხანძრის გამო, მოგიწოდებთ დაემორჩილოთ საბერძნეთის შესაბამისი უწყებების მიერ გავრცელებულ მითითებებს: აუცილებლობის გარდა ნუ გადაადგილდებით ჩრდილოეთი ატიკის რეგიონში. ამასთან, რეკომენდებულია, დახუროთ კარები და ფანჯრები.

შეგახსენებთ, რომ უწყვეტ რეჟიმში მოქმედებს საელჩოს ცხელი ხაზი 6995779793.

საბერძნეთის სახელმწიფო გთავაზობთ შემდეგ მომსახურებას: ატიკას მაცხოვრებლებო, თუ ხანძრის გამო სახლში ვერ მიდიხართ, დარეკეთ 1135-ზე. მოგაწვდით ინფორმაციას თუ რომელ სასტუმროში განთავსდეთ. სახელმწიფო სრულიად დაფარავს ხარჯებს.

აქვე მიგითითებთ შემდეგ ტელეფონის ნომრებს: საბერძნეთის პოლიცია – 100, სახანძრო სამსახური – 199, სასწრაფო დახმარება – 166,” – ნათქვამია საელჩოს მიერ გავრცელებულ ინფორმაციაში.

შეგახსენებთ, საბერძნეთის ზოგიერთ ნაწილში ტემპერატურა 43 გრადუსს აღწევს, ამის პარალელურად კი, მეხანძრეები ცეცხლს კრიონერიში, ჩრდილოეთ ათენის და მესინიას სამხრეთ ნაწილში ებრძვიან.

სახანძრო ბრიგადების ინფორმაციით, კრიონერიში ცეცხლს ადამიანები და უძრავი ქონება არ დაუზიანებია.

ხოლო კორონიში ხანძარმა ზოგიერთი სახლის შიდა ეზოებში შეაღწია.

ათობით სახანძრო და ვერტმფრენი ცეცხლის შეჩერებას ცდილობს.

თვითმხილველთა თქმით, ხანძრისგან გამოწვეული კვამლის დანახვა კალამატას სანაპიროდანაც კი არის შესაძლებელი.