პარტია „საქართველოსთვის“ ლიდერი გიორგი გახარია არ გამორიცხავს, რომ მუნიციპალიტეტების დონეზე, კონკრეტულ კანდიდატებთან მიმართებაში მისმა პარტიამ სხვა ოპოზიციურ პოლიტიკურ პარტიებთან ითანამშრომლოს, მაგრამ მისივე თქმით, პარტიას თბილისში თავისი კანდიდატი ეყოლება.
„კანდიდატებთან დაკავშირებით სრულად გამოვიყენებთ დროს, რომელიც ჩვენ გვაქვს. მოგეხსენებათ, რომ პარტია „საქართველოსთვის“ ერთდროულად ვაყალიბებთ პარტიულ სტრუქტურასაც და ვმონაწილეობთ მუნიციპალურ არჩევნებში. ჩვენ არ გვაქვს ის ფუფუნება, რაც აქვთ ჩვენს კონკურენტ პარტიებს, რომელიც ათწლეულებია უკვე პარტიული სტრუქტურა ჩამოყალიბებული აქვთ. ამიტომ ნება მოგვეცით, რომ ცოტა მოგვიანებით წარვადგინოთ კანდიდატები. რაც შეეხება თბილისს, არანაირი კონკრეტული გადაწყვეტილება თბილისის მერობის კანდიდატთან დაკავშირებით დღეს არ არსებობს. ვმუშაობთ და გვეყოლება ღირსეული კანდიდატი.
თანამშრომლობას სხვა ოპოზიციურ პარტიებთან მუნიპალური არჩევნების კონტექსტში არ ვაპირებთ, ამას ხაზგასმით ვამბობთ. კონკრეტული ინდივიდების ჭრილში, კონკრეტულ უბნებთან, ოლქებთან მიმართებაში ეს შესაძლებელია და დამოკიდებულია პერსონებზე“, – განაცხადა გახარიამ.