საქართველოს პრეზიდენტი სალომე ზურაბიშვილი არ ეთანხმება მმართველი პარტიის პოზიციას იმასთან დაკავშირებით, რომ შარლ მიშელის დოკუმენტმა პოლარიზაციის შემცირებას ხელი ვერ შეუწყო, ასევე, ის ამბობს, რომ ვერ აიღებს პასუხისმგებლობას დოკუმენტის ანულირებაზე.
სალომე ზურაბიშვილის თქმით, შარლ მიშელის დოკუმენტი სწორედ ის გზაა, რომელზეც საქართველომ უნდა გაიაროს.
“ვიღებ ერთგვარ პასუხისმგებლობას და ვამაყობ რომ ხელი შევუწყვე ევროკავშირის ჩართულობას მაშინ, როცა პოლიტიკური კრიზისი ჩიხში შედიოდა, თუმცა ვერ ავიღებ პასუხისმგებლობას დოკუმენტის ცალკეულ ელემენტებზე, რომლებიც იყო მხარეებს შორის შეთანხმებული და ვერც მის ანულირებაზე” – ამბობს პრეზიდენტი.
შეგახსენებთ, რომ 28 ივლისს მმართველმა პარტიამ შარლ მიშელის შეთანხმება ანულირებულად და ამოწურულად გამოაცხადა.