ბოლო ერთი თვის განმავლობაში კოვიდინფექცია კრიმინალური სამყაროს წევრებსა და გამორჩეულ ფიგურებსაც შეეხო. ეს განსაკუთრებით ეხება საქართველოს მოქალაქე ქურდული სამყაროს წევრებს, რომლებმაც კარგა ხანია, ქვეყანა დატოვეს და მსოფლიოს სხვადასხვა ქალაქებს აფარებენ თავს.

მაგალითად, იაროსლავლში გარდაიცვალა 64 წლის, ცნობილი ქუთაისელი ე.წ. კანონიერი ქურდი ნიკოლოზ სოხაძე, იგივე კოკი. მისი გარდაცვალების მიზეზად ფილტვების უკმარისობა დასახელდა კოვიდინფიცირების შემდეგ.

სოხაძე, იგივე კოკი 7-ჯერ იყო ნასამართლევი, მან საქართველო ჯერ კიდევ 1990-იან წლებში დატოვა და რუსეთში გადაბარგდა, სადაც რჩებოდა მას შემდეგაც, რაც ქურდული სამყაროს წევრობა, საქართველოს მიბაძვით, რუსეთშიც დასჯადი გახდა.

ასევე ივნისში, ათენში გარდაიცვალა 68 წლის თბილისელი ე.წ. კანონიერი ქურდი თამაზ კოროშინაძე. ის კორონავირუსით იყო ინფიცირებული. კოროშინაძე კლინიკაში დროულად გადაიყვნეს, მაგრამ მისი გადარჩენა ვერ მოხერხდა.

რაც შეეხება კოვიდინფექციის კიდევ ერთ მსხვერპლს, ის 92 წლის სანკტ-პეტერბურგელი, კრიმინალური სამყაროს ვეტერანი, ვალენტინ გუდიევსკია, რომელსაც ასევე, კოვიდინფექცია დაუდგინდა და ფილტვების უკმარისობით დაიღუპა. ვალენტინ გუდიევსკი კრიმინალური სამყაროს უხუცესი წევრი იყო და მას ლენინგრადის ბლოგადაც ჰქონდა გადატანილი.