ამ წუთებში თბილისში, პარლამენტის შენობის წინ მიმდინარე საპროტესტო აქციიდან რამდენიმე ტელევიზიის საერთო ეთერი დაიწყო. ტრანსლაციას შეუერთდნენ რადიოებიც. ჟურნალისტები და მედიამენეჯერები, რომლებიც ამ საპროტესტო აქციის ორგანიზატორები არიან, პრემიერ ირაკლი ღარიბაშვილის გადადგომას და მოძალადეთა დასჯას ითხოვენ.
“არ ვიცით, როგორ წავიყვანთ ამ გადაცემას, არანაირი საერთო გეგმა არ გვაქვს, მაგრამ ვიცით, რომ ეს უნდა გავაკეთოთ”, – განაცხადა ტვ პირველის ტელეწამყვანმა ინგა გრიგოლიამ.
შეგახსენებთ, „ტვ პირველის“ ოპერატორი ლექსო ლაშქარავა საკუთარ სახლში გარდაცვლილი იპოვეს. ლექსო ლაშქარავას გარდაცვალების ფაქტზე გამოძიება საქართველოს სისხლის სამართლის კოდექსის 115 მუხლით დაიწყო. შსს-ს ინფორმაციით, მიმდინარე წლის 5 ივლისს, თბილისი პრაიდის წინააღმდეგ გამართული აქციის გაშუქების დროს, ინგოროყვას ქუჩაზე მდებარე ორგანიზაცია „სირცხვილიას“ ოფისში, ტელეკომპანია „ტვ 1“-ის ჟურნალისტსა და ოპერატორს, ალექსანდრე ლაშქარავას სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენეს.
ლექსო ლაშქარავას გარდაცვალების შემდეგ თბილისში, პარლამენტის შენობის წინ საპროტესტო აქცია დაიწყო. აქციაზე ათასობით ადამიანი გამოვიდა. მედიამენეჯერებმა და ჟურნალისტებმა ბიძინა ივანიშვილს ულტიმატუმი წაუყენეს: დილამდე გადააყენოს პრემიერი ირაკლი ღარიბაშვილი და დაისაჯონ ლექსო ლაშქარავას მკვლელები.