ზუგდიდის საგამოცდო ცენტრში ერთიანი ეროვნული გამოცდები მიმდინარეობს. აქ პირველ სესიაზე რეგისტრირებული 271 აბიტურიენტიდან 36 არ გამოცხადდა, შესაბამისად ქართული ენისა და ლიტერატურის გამოცდას 235 კურსდამთავრებული აბარებს. ცენტრის ხელმძღვანელი ნანა ქირია ამბობს, რომ არანაირი ხარვეზი არ ყოფილა გამოცდებზე, დაცულია რეგულაციების ნორმები და არც ერთ აბიტურიენტს მაღალი ტემპერატურა არ დაუფიქსირებია.

„არ გამოცხადდა 36 აბიტურიენტი, არ მაქვს ინფორმაცია რა მიზეზით არ გამოცხადდა აბიტურიენტების ნაწილი, თუ ეს ეხება კორონავირუსს და მათ აქვთ შესაბამისი ცნობა, ცენტრი მიიღებს გადაწყვეტილებას მათთან დაკავშირებით. რაც შეეხება საგამოცდო პროცესს, ჯანდაცვის სამინისტროს რეკომენდაციები დაცულია, ყველამ გაიარა თერმოსკრინინგი და დეზობარიერი. რაიმე განსაკუთრებული შემთხვევა არ გვქონია“, – უთხრა “”ოდიშინიუსს” ნანა ქირიამ.
რაც შეეხება ოკუპირებულ აფხაზეთში მცხოვრებ აბიტურიენტებს, მთავრობის გადაწყვეტილებით, ისინი საქართველოს აკრედიტებულ უმაღლეს სასწავლებლებში ერთიანი ეროვნული და საერთო სამაგისტრო გამოცდების გარეშე ჩაირიცხებიან.
გამოცდიდან გამოსული აბიტურიენტები ამბობენ, რომ ტესტი საშუალო სირთულის იყო.