კომენდანტის საათის გაუქმების მიუხედავად, საქართველოს მასშტაბით რესტორნები, კაფე-ბარები და კლუბები ღამის 12 საათამდე იმუშავებენ – გადაწყვეტილება უწყებათაშორის საკოორდინაციო საბჭოზე დღეს მიიღეს.
“ერთი შეზღუდვა რაც რჩება ეს არის რესტორნების მიმართ, რომლებიც იმუშავებენ მხოლოდ ღამის 12 საათამდე, 12 საათის შემდეგ რესტორნები არ იმუშავებს, იგივე ეხება სხვა გასართობ დაწესებულებებს, ღამის კლუბებს, სასტუმროს, რესტორნებს და სხვა” – აღნიშნა მთავრობის წარმომადგენელმა.
ამასთან, შეზღუდვა რჩება: დახურულ სივრცეებში პირბადის ტარების ისევ სავალდებულოა, სავალდებულოა ასევე, დისტანციის დაცვა. პირბადის ტარება სავალდებული იქნება ასევე, საზოგადოებრივ ტრანსპორტში, საზოგადოებრივი ტრანსპორტის გაჩერებებზე და ტაქსით გადაადგილებისას.
შეგახსენებთ, 1 ივლისიდან საქართველოში კომენდანტის საათი უქმდება, ხოლო პირბადის ტარება ღია სივრცეში უკვე დღეიდან სავალდებულო არ არის.
ამის მიუხედევად, პირბადესთან დაკავშირებით მხოლოდ ტარების ვალდებულებაა მოხსნილი: როგორც სპეციალისტები ამბობენ, პირბადის ტარება ღია სივრცეში არ არის სავალდებულო, მაგრამ რეკომენდირებულია.