ლენტეხში მომხდარი სასტიკი მკვლელობის საქმეზე დაკავებულია სოფელ ჩიხარეშის რწმუნებულის მეუღლე. მას გამოძიება დანაშაულის შეუტყობინებლობას ედავება.

პოლიციამ საქმეზე კიდევ ერთი პირი დააკავა, რომელიც მოკლულის მასპინძელია. მიკროავტობუსის მძღოლზე თავდასხმის მთავარ ფიგურანტებს კი სამართალდამცველები ამ დრომდე ეძებენ.

შინაგან საქმეთა სამინისტროში ადასტურებენ, რომ მომხდართან დაკავშირებით დაკავებულია 2 ადამიანი, მათ წინააღმდეგ გამოძიება სისხლის სამართლის კოდექსის 370-ე მუხლით დაიწყო რაც ცრუ ჩვენების მიცემას გულისხმობს.

შემთხვევა სოფელ ჩიხარეშში ხუთ ივნისს მოხდა. მიკროავტობუსის მძღოლი, რომელიც ლენტეხში ცემით მოკლეს 47 წლის რობინზონ თუთარაშვილია. გარდაცვლილის ოჯახის წევრები ამბობენ, რომ კაცს ქვემო სვანეთში თანხას სისტემატიურად სთხოვდნენ. ყოველ რეისზე 100 დოლარს, 200 დოლარს. ბოლო შემთხვევის დროს მან ფულის მიცემაზე უარი თქვა, სწორედ ამას მოჰყვა დაპირისპირება- ცემით სიკვდილის პირას მიიყვანეს, მერე ნაცემი მიატოვეს – ამბობს ნათესავი, გიორგი თუთარაშვილი.