ვიცით ჩვენ, სადაც არის ბადრი ესებუა – ისვენებს, – ასე უპასუხა ამჯერად შს მინისტრმა ვახტანგ გომელაურმა ჟურნალისტების მიერ დასმულ შეკითხვას “საქართველოს ბანკის” ზუგდიდის ფილიალის ძარცვაში ბრალდებულ ბადრი ესებუასთან დაკავშირებით.
ჟურნალისტები დაინტერესდნენ, ჰქონდა თუ არა პოლიციას ინფორმაცია ბადრი ესებუას შესახებ და როდის ან რა გზით აპირებდა მის დაკავებას. მათ შს მინისტრს შეკითხვა მას შემდეგ დაუსვეს, რაც გომელაურმა პოლიციის დღესთან დაკავშირებით მედიასთან კომენტარი გააკეთა.
შეგახსენებთ ფრაზებს, რომლებითაც ვახტანგ გომელაური სხვადასხვა დროს პასუხობდა ჟურნალისტებს მას შემდეგ, რაც 2020 წლის 22 ოქტომბერს ბადრი ესებუა საქართველოს ბანკის ფილიალს თავს დაესხა, მძევლები აიყვანა, შემდეგ კი ფული გაიტაცა, მძევლები გაათავისუფლა და მიიმალა.
“კვირა კი არა, შეიძლება, ერთი თვე ვსდიოთ, არ არის ეგ პრობლემა”; “საქმეზე ვმუშაობთ, ხომ ხედავთ? დავაკავეთ ძმა, რომელიც ეხმარებოდა”; “სად წავა? დღეს არა, ხვალ დავაკავებთ”.