შს მინისტრი ვახტანგ გომელაური აცხადებს, რომ პოლიცია გამოიყენებს წყლის ჭავლსაც და ცრემლსადენ გაზსაც, თუკი რიონის ხეობაში სიტუაცია დაიძაბება და განმუხტვისთვის ამ სპეცღონისძიებების საჭიროება იქნება.
შს მინისტრის განცხადებას რიონის ხეობის მცველთა ლიდერმა ვარლამ გოლეთიანმა უპასუხა და განაცხადა, რომ საორგანიზაციო ჯგუფი თითქმის ყოველდღე აკავებს აგრესიულად განწყობილ ჯგუფებს და რომ თუ ისინი (ხეობის მცველები) იქ არ იქნებიან, “ხეობაში მოსალოდნელობა და რისკი ამ შეჭრების იმატებს, გამაკონტროლებელი აღარ ეყოლება იმ ჯგუფებს”.
შეგახსენებთ, 200 დღეზე მეტია, რიონის ხეობაში ნამოხვანჰესის მშენებლობას აპროტესტებენ. რამდენიმე დღით საპროტესტო აქციამ დედაქალაქში გადმოინაცვლა, თუმცა, დაპირებული “დედაქალაქის პარალიზება” არ შედგა და საპროტესტო აქციის მონაწილეები ისევ რიონის ხეობაში დაბრუნდნენ. მათ გუმათჰესთან გზა გადაუკეტეს, აქციის მონაწილეები კი რკინის ჯებირებს მუშტებს ურტყამდნენ, რის შემდეგაც შსს-მ სხვისი ქონების დაზიანების მუხლით გამოძიება დაიწყო, ხოლო აქციის მონაწილეთა ნაწილი ადმინისტრაციული წესით დააკავა.