შინაგან საქმეთა სამინისტრო ავრცელებს ინფორმაციას, რომ გუმათჰესთან, იმ ადგილას, სადაც გზა გადაკეტილია რკინის ჯებირებით, რიონის ხეობის მცველებმა, რომლებიც თბილისიდან იმერეთის რეგიონში გუშინ, 26 მაისს დაბრუნდნენ, “ჯებირებს ქვები და სხვა საგნები დაუშინეს” და დააზიანეს, რის გამოც გამოძიებაა დაწყებული.
განცხადებაში ნათქვამია:
შსს-ს იმერეთი, რაჭა-ლეჩხუმისა და ქვემო სვანეთის პოლიციის დეპარტამენტმა, სოფელ გუმათში სხვისი ნივთის დაზიანების ან განადგურების ფაქტზე, გამოძიება საქართველოს სისხლის სამართლის კოდექსის 187-ე მუხლით დაიწყო.
დაზიანებულია პოლიციის მიერ გუმათჰესთან უსაფრთხოების მიზნით განთავსებული რკინის ჯებირები.ნამახვანჰესის მშენებლობის მოწინააღმდეგეებმა გუშინ თბილისიდან რიონის ხეობაში გადაინაცვლეს და გუმათში განაგრძეს საპროტესტო აქცია.
შეკრებილები მთელი ღამის განმავლობაში პოლიციის უსაფრთხოების ჯებირებს ქვებს და სხვადასხვა საგნებს ურტყამდნენ. სამინისტრო დეტალურად სწავლობს კანონდარღვევის ფაქტს და შესაბამისი სამართლებრივი რეაგირება მოჰყვება.
შინაგან საქმეთა სამინისტრო, მოუწოდებს მოქალაქეებს, შეკრების და გამოხატვის თავისუფლების დროს დაიცვან კანონის მოთხოვნები და დაემორჩილონ პოლიციელთა კანონიერ მოთხოვნებს.