ზუგდიდის ბოტანიკურ ბაღში კიდევ ერთი ქურდობის ფაქტი დაფიქსირდა. ბაღში მდებარე საპირფარეშოში უნიტაზის წყლის მილი მოიპარეს. “ოდიშინიუსს” ფოტოები წყარომ მიაწოდა. ბოტანიკური ბაღის დირექტორი ზვიად ქარჩავა ფაქტს ადასტურებს და ამბობს, რომ ეს პირველი შემთხვევა არ არის, როცა ბაღში ქურდობა ხდება:
“არ ვიცი რა ვთქვა, საპირფარეშოში კამერას ხომ ვერ დავაყენებთ. მილია მოპარული, ხან ნათურებს ტეხენ, ხან ფარშევანგს კუდს აგლეჯენ, ხან სკამებს აზიანებენ. გარეთა პერიმეტრზე კამერებია დამონტაჟებული, მაგრამ საპირფარეშოში შიგნით ხომ ვერ ვიზამთ ამას..ფარშევანგიც ამიტომ გვყავს ვოლიერში რომ კუდი მოაძვრეს. ყველა ადამიანს უნდა ქონდეს პასუხისმგებლობა, რომ ეს არ გააკეთოს”‘- უთხრა “ოდიშინიუსს” ზვიად ქარჩავამ.
ცნობისთვის, წყლის მილი, რომელიც ბოტანიკურ ბაღში მოიპარეს, 4 ლარი ღირს.
