შსს-მ ექთნის გარდაცვალების ფაქტზე გამოძიება დაიწყო. სისხლის სამართლის საქმე აღძრულია 116-ე მუხლის პირველი ნაწილით, რაც გაუფრთხილებლობით სიცოცხლის მოსპობას გულისხმობს.
მედიკოსები და მთელი საზოგადოება შეშფოთებულია. ექიმები ამბობენ, რომ აუცილებელია დადგინდეს რა გახდა ახალციხის საავადმყოფოში მომხდარის მიზეზი, რამაც ახალგაზრდა ექთნის სიკვდილი გამოიწვია, რადგან ეს ფაქტი კიდევ უფრო ზრდის უნდობლობას ვაქცინასთან დაკავშირებით.
მედიკოსები განმარტავენ, რომ ანაფილაქსიური რეაქცია არაპროგნოზირებადია. ,,ჩვენ წინასწარ ვერ განვსაზღვრავთ რამდენია ამ რეაქციის ალბათობა. რისკებზე არის ლაპარაკი, როდესაც პაციენტს აქვს მკვეთრად გამოხატული ალერგიული რეაქცია, როდესაც პაციენტს რომელიმე მედიკამენტზე ქონია ძლიერი ალერგიული რეაქცია” – ამბობენ ისინი , მაგრამ ერთი რამ აშკარაა: ჯანდაცვის უწყება გამოწვევის წინაშე დგას – კლინიკებში საკმაოდ მძიმე სურათია, რადგან სისტემა მზად არ არის ვაქცინაციის პროცესის გართულების შემთხვევაში გაუმკლავდეს მას.
კითხვებს იწვევს ჯანაცვის სამინისტროს გადაწყვეტილება გუშინ სასწრაფოდ ვაქცინაციის სიიდან ამბულატორიული დაწესებულებების ამოღების შესახებ.
,,თუ არ იყო მათი მზაობა რატომ იყო, თუ იყო მზაობა, მაშინ რატომ ამოიღეს. ძალიან ბევრი კითხვის ნიშანი ჩნდება და ძალიან ბევრი რამ მიმდინარეობს საკმაოდ ბუნდოვნად. ძალიან საინტერესო და მნიშვნელოვანია რამდენად სწრაფად გაეწია მას პირველადი გადაუდებელი დახმარება” – -ამბობენ ისინი
შეგახსენებთ, ახალციხიდან გადმოყვანილი ექთანი, მეგი ბაქრაძე დღეს, პირველ საუნივერსიტეტო კლინიკაში გარდაიცვალა. გარდაცვლილის ახლობლები მოითხოვენ პასუხს კითხვაზე, სასწრაფოდ გაირკვეს, გაკეთდა თუ არა ყველაფერი ახალციხის კლინიკაში ქალის შოკიდან გამოყვანისათვის, რა შეცდომა დაუშვეს ახალციხის კლინიკაში ვაქცინის შეყვანამდე, იყო თუ არა შოკი ექიმების დაუდევრობის შედეგი, რამაც ახალგაზრდა ქალის სიკვდილი გამოიწვია