“ოდიშინიუსის” ინფორმაციით ძებნილი ბეჟან გვაზავა დაკავებულია. ბეჟან გვაზავას 7 წლით და 15 დღით თავისუფლების აღკვეთა, პატიმრობა დაუსწრებლად შეეფარდა 2019 წლის 7 დეკემბერს. სასამართლომ ბეჟან გვაზავა დამნაშავედ ცნო განზრახ მკვლელობის მცდელობასა და იარაღის მართლსაწინააღმდეგო ტარებაში.
გვაზავამ ცეცხლსასროლი იარაღით ალიკა ლაგვილავას ესროლა. გვაზავა გრიგოლიშის “ქართული ოცნების” შტაბის ხელმძღვანელი იყო , ხოლო ალიკა ლაგვილავა ამავე შტაბის კოორდინატორი. ბეჟან გვაზავასა და ალიკა ლაგვილავას შორის დავა მიწის ნაკვეთს უკავშირდებოდა. შინაგან საქმეთა სამინისტრომ ზუგდიდში ახალგაზრდა კაცის სხეულის დაზიანების ფაქტზე გამოძიება 19-108 მუხლით დაიწყო, რაც განზრახ მკვლელობის მცდელობას გულისხმობს. გვაზავა არჩევნებში “ოცნების” მხარდამჭერი იყო და მედიაში გავრცელებული ინფორმაციის თანახმად, ის ზუგდიდის ქუჩებშიც დააფიქსირეს.

ინფორმაციის გადამოწმება “ოდიშინიუსმა” შსს-ში სცადა, სადაც განუცხადეს, რომ ინფორმაციას მოიძიებენ და მოგვაწვდიან.