საკოორდინაციო საბჭოს გადაწყვეტილებით 25 თებერვლიდან შეზღუდვების შემსუბუქება იწყება. თუმცაღა პრემიერმინისტრ ირაკლი ღარიბაშვილის განცხადებით, ე.წ. კომენდანტის საათი კვლავ ძალაში რჩება.
25 თებერვლიდან
- აღდგება საქალაქთაშორისო ტრანსპორტი;
- გაიხსნება სასტუმროები სამთო კურორტებზე.
1-ლი მარტი
- მუშაობას აღადგენენ კერძო და საჯარო ბაღები. ორ კვირაში ერთხელ თანამშრომლების 20 პროცენტის ტესტირება სავალდებულო იქნება.
- ბათუმში რესტორნები შიდა სივრცეებში ფუნქციონირებას განაახლებენ. დანარჩენ საქართველოში 8 მარტიდან. რესტორნები შაბათ-კვირაც ფუნქციონირებას კვლავ ვერ შეძლებენ.
- განახლდება კონფერენციები და ტრენინგები.
- უმაღლესი და პროფესიული სასწავლებლები კლინიკური, პრაქტიკული, ლაბორატორიული საქმიანობის აღდგენას და გამოცდების არადისტანციურ ფორმატში ჩატარებას შეძლებენ.
- მუშაობას განაახლებენ მუზეუმები და ბიბლიოთეკები.
8 მარტი
- გაიხსნება სამთო კურორტებზე საბაგიროები.
- არასასურსათო საცალო ვაჭრობა შაბათ-კვირის ჩათვლით, იგულისხმება როგორც სავაჭრო მოლები, ისე ბაზრობები, მუშაობას განაახლებენ.
15 მარტი
- გაიხსნება სპორტული დარბაზები.
- უმაღლეს და პროფესიულ სასწავლებლებში სასწავლო პროცესი აუდიტორიებში აღდგება.
- განახლდება სასკოლო წრეები.
- თეატრები, სპორტული კლუბები, პროფესიული ანსამბლები რეპეტიციებისა და ვარჯიშს აღადგენენ.
1-ლი აპრილი
- თეატრები, სპორტული კლუბები, პროფესიული ანსამბლები საქმიანობას სრულად აღადგენენ (თეატრალური წარმოდგენები, სპორტული შეჯიბრებები მაყურებლის დასწრებით).
გარდა ამისა, მთავრობის გადაწყვეტილებით, იმ ქვეყნების ჩამონათვალს, რომელთა მოქალაქეებს საქართველოს საჰაერო საზღვრის გავლით ქვეყანაში შემოსვლა შეუძლიათ PCR ტესტის ნეგატიური პასუხით, 1 მარტიდან ემატება შემდეგი ქვეყნები: სომხეთი, აზერბაიჯანი, უკრაინა, ყაზახეთი, რუსეთი, ბელარუსი. სახმელეთო საზღვარი კვლავ ჩაკეტილია.