ISFED-ში დღეს, 29 იანვარს 2020 წლის საპარლამენტო არჩევნების ხმების პარალელური დათვლის უბნებზე შემაჯამებელ ოქმებში აღმოჩენილ დისბალანსზე განცხადება კიდევ ერთხელ გააკეთეს. სამართლიანი არჩევნების წარმომადგენლების თქმით, მათ ხელახლა გადაითვალეს საპარლამენტო არჩევნების 850 PVT უბანი და აღმოჩნდა, რომ შემაჯამებელი ოქმებში მეტობით დისბალანსი 8%-ს შეადგენდა. მათი განცხადებით, ოქმებში დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა
სამართლიანი არჩევნების (ISFED) ყოფილი ხელმძღვანელი, ელენე ნიჟარაძე ამბობს, რომ დღეს ISFED-ის მიერ გამოქვეყნებული განცხადება კიდევ ერთხელ დადასტურებაა იმისა, რასაც ის არჩევნების შემდეგ დაუღალავად ლაპარაკობდა. ნიჟარაძის თქმით, ეს არის შემაჯამებელ ოქმებში დაფიქსირებული პრობლემები და ამის არასათანადოდ შესწავლა.
“ძალიან მიხარია კიდევ ერთხელ იმის დადასტურება, რასაც არჩევნების შემდგომ დაუღალავად ვლაპარაკობდი — შემაჯამებელ ოქმებში დაფიქსირებული პრობლემები და ამის არასათანადოდ შესწავლა იყო ამ არჩევნების ერთ-ერთი უმთავრესი პრობლემა. ეს არის, რაზეც პასუხი უნდა მოეთხოვოს ხელისუფლებას. ამასთან, ეს კიდევ ერთხელ ამტკიცებს საარჩევნო რეფორმის აუცილებლობას. თავის დროზე რომ მომხდარიყო ყველა რეკომენდაციის გათვალისწინება, რასაც ხელისუფლებას ვთავაზობდით, დღეს ეს პრობლემები არ იქნებოდა”, — წერს ნიჟარაძე ფეისბუქზე.
ის, ასევე, ამბობს, რომ მის არჩევნებზე მუშაობის გამოცდილებიდან გამომდინარე, ეს არჩევნები იყო ყველაზე ცუდი თავისი წინასაარჩევნო კამპანიით, არჩევნების დღითა და შემდგომ პერიოდში საჩივრების განხილვის პროცესით. ნიჟარაძის თქმით, სწორედ ამან გამოიწვია მწვავე პოლიტიკური კრიზისი.
“იმედია, ამით დამთავრდება არასამთავრობო ორგანიზაციებზე მმართველი პარტიის თავდასხმები, რომელიც რეალური პრობლემების გადაფარვას ემსახურება მხოლოდ და პოლიტიკური კრიზისის მოსაგვარებლად სხვა საშუალებებს გამოიყენებენ.
კიდევ ერთხელ ყველას დიდი მადლობა, ვინც მხარდაჭერა და თანადგომა გამოხატა “სამართლიანი არჩევნების” და ასევე, პირადად ჩემ მიმართ”, — აღნიშნავს ნიჟარაძე.