ზუგდიდის „დინამო“ სეზონის დასრულების შემდეგ სამმა მოთამაშემ დატოვა და ახალ კლუბს მოძებნიან, – ამის შესახებ ინფორმაციას ზუგდიდის გუნდის პრესსამსახური ავრცელებს.

„ურთიერთშეთანხმების საფუძველზე გუნდი დატოვეს გოჩა ცირდავამ, პაპუნა მოსემღვდლიშვილმა და მიხეილ რუხაიამ – კლუბი თითოეულ მათგანს მადლობას უხდის გაწეული საქმიანობისთვის და წარმატებებს უსურვებს საფეხბურთო კარიერაში“, – წერია ზუგდიდის „დინამოს“ ოფიციალურ ვებგვერდზე.

„დინამო“ ახალი საფეხბურთო სეზონისთვის ზუგდიდში ემზადება. ჩემპიონატის დაწყებამდე, ფეხბურთელებიც ორჯერად ვარჯიშებზე არიან გადასულები. ზუგდიდელთა მთავარი მწვრთნელი კახა გოგიჩაიშვილი ამ ეტაპზე დროს მთლიანად ფიზიკურ მომზადებას უთმობს, უახლოეს დღეებში კი საკონტროლო მატჩები დაგეგმა.

2021 წელს გუნდი პირველ საკონტროლო მატჩს 25 იანვარს, წყალტუბოში „სამგურალი 2“-თან გამართავს, 28 იანვარს, ურეკში, ეროვნულ ლიგაში აღზევებულ ქობულეთის „შუქურას“ შეხვდება, ხოლო 4 თებერვალს მარტვილში „მერანს“ ესტუმრება.