აშშ-ის წარმომადგენელთა პალატის სპიკერი, ნენსი პელოსი, ამბობს, რომ ის მზადაა დონალდ ტრამპის იმპიჩმენტის პროცედურა მეორედ განიხილოს, თუ ვიცეპრეზიდენტი, მაიკ პენსი, 25-ე შესწორებით მხარს არ დაუჭერს ტრამპის გადაყენებას. ინფორმაციას DW ავრცელებს CNN-ზე დაყრდნობით.

“გადაუდებლად ვიმოქმედებთ ჩვენი კონსტიტუციისა და დემოკრატიის დასაცავად, რადგან პრეზიდენტი მათთვის საფრთხეს წარმოადგენს”, – ამბობს პელოსი.

წარმომადგენელთა პალატა დღეს კენჭს უყრის რეზოლუციას, რომლითაც პენსს 24-საათიან ვადას მისცემს პრეზიდენტის გადასაყენებლად.

ცნობისთვის, მაიკ პენსი ბაიდენის ინაუგურაციას დაესწრება.

ამერიკის შეერთებულ შტატებში პოლიტიკური ვითარება განსაკუთრებით მას შემდეგ დაიძაბა, რაც 6 იანვარს დონალდ ტრამპის მომხრეებმა კაპიტოლიუმზე შტურმი მიიტანეს. არეულობას 5 ადამიანი ემსხვერპლა. დაპირისპირება მას შემდეგ დაიწყო, რაც მოქმედმა პრეზიდენტმა საკუთარ მხარდამჭერებს კაპიტოლიუმის მიმართულებით მსვლელობისაკენ და 3 ნოემბრის არჩევნების შედეგების დაცვისკენ მოუწოდა.