ქარიშხალ „იოტას“ ცენტრალური ამერიკის რეგიონში 30-ზე მეტი ადამიანის სიცოცხლე ემსხვერპლა, – ამის შესახებ ინფორმაციას Reuters-ი ავრცელებს.

სააგენტოს ცნობით, სტიქიის გამო ათასობით ადამიანი იძულებული გახდა, საკუთარი სახლები დაეტოვებინა.

ჩრდილოეთ კოლუმბიიდან სამხრეთ მექსიკამდე მდებარე უამრავ სოფელში ქარიშხლისგან გამოწვეულმა ძლიერმა წვიმამ მდინარეების ადიდება და ღვარცოფი გამოიწვია. სტიქიამ ყველაზე მეტად ჰონდურასის ქალაქი სან-პედრო-სულა დააზარალა. მთლიანად დაიტბორა ქალაქის აეროპორტი.

სტიქიის გამო ნიკარაგუას 160 000 და ჰონდურასის 70 000 მცხოვრები დროებით თავშესაფრებშია გადაყვანილი.

შეგახსენებთ, ნიკარაგუის აღმოსავლეთ სანაპიროს მე-5 კატეგორიის ქარიშხალი „იოტა“ ორი დღის წინ დაატყდა თავს. ცენტრალური ამერიკის ქვეყნებს 2 კვირის წინ კიდევ ერთი ქარიშხალი, „ეტა“ დაატყდა თავს, რომელსაც სულ მცირე, 200 ადამიანი ემსხვერპლა.