სახელმწიფო გადატრიალების საქმეზე დაწყებული გამოძიების ფარგლებში დაკითხვები გრძელდება. ამჯერად მაგისტრი მოსამართლის თანდასწრებით, სამგორის ერთ-ერთი საარჩევნო უბნის დამკვირვებელი, ვარლამ ლორთქიფანიძე გამოიკითხა. შეკითხვები ძირითადად ოპოზიციის წარმომადგენლებთან ნაცნობობას და მის საქმიანობას ეხებოდა.
ლორთქიფანიძე, მაგისტრი მოსამართლის თანდასწრებით მას შემდეგ გამოიკითხა, რაც უსაფრთხოების სამსახურში ჩვენების მიცემაზე უარი თქვა, რადგან დარწმუნებულია, რომ სუსი მორიგ პოლიტიკურ საქმეს კერავს. თავად გამოკითხული ვარლამ ლორთქიფანიძე ამბობს, რომ ჰკითხეს იცნობდა თუ არა ვანო მერაბიშვილსა და დევი ჭანკოტაძეს. მისი თქმით, მერაბიშვილს არ იცნობს, თუმცა დევი ჭანკოტაძესთან ერთად ცხინვალში იბრძოდა.
შეგახსენებთ, ქართული ოცნების ერთერთმა სახემ ირაკლი კობახიძემ ე.წ. გადატრიალების გეგმის ავტორებად მიხეილ სააკაშვილი, დიმიტრი შაშკინი და დევი ჭანკოტაძე დაასახელა.
სუს-ი აცხადებს, რომ 2020 წლის სახელმწიფო ხელისუფლების დამხობის ფაქტზე, სისხლის სამართლის კოდექსის 315-ე მუხლის პირველი ნაწილით დაიწყეს. მათივე განცხადებით, გამოძიების დაწყების საფუძველი ოპერატიული ინფორმაცია გახდა.