ტვ პირველი ავრცელებს ინფორმაციას, რომ ზუგდიდში საქართველოს ბანკზე თავდამსხმელის თანამზრახველმა ნახევარი მილიონი დოლარი უკვე აფხაზეთის ტერიტორიაზე გადაიტანა.
გომელაურის უწყება ამ ინფორმაციაზე არაფერს ამბობს და სამეგრელოში ბადრი ესებუას დაკავების უშედეგო მცდელობების შემდეგ მას აჭარაში დაეძებს, თუმცა ამაზე ოფიციალურად არ ადასტურებს.
შინაგან საქმეთა მინისტრი ბათუმშია, თუმცა უცნობია მისი აჭარაში ვიზიტის მიზეზი. ჟურნალისტებს კითხვაზე, რას უკავშირდება მისი იქ ჩასვლა, ვახტანგ გომელაური პასუხობს, რომ მას “აჩოტებს” არ ჩააბარებს.
“მინდა ბათუმში წავალ, მინდა სამცხეში, მინდა კახეთში, შინაგან საქმეთა მინისტრი ვარ. თქვენ არ გაბარებთ აჩოტებს, მე სად ვივლი, უკაცრავად”, – უთხრა მინისტრმა ჟურნალისტს.
გუშინ, 27 ოქტომბერს მან ისიც განაცხადა, რომ ზუგდიდში, საქართველოს ბანკის ფილიალზე თავდასხმაში ბრალდებული ბადრი ესებუას ძებნა, შესაძლოა, 1 თვესაც გაგრძელდეს, თუმცა მისივე თქმით, ეს არანაირი პრობლემა არ არის.
ზუგდიდში, საქართველოს ბანკზე თავდამსხმელის ძებნა მე-8 დღეა გრძელდება.