ზუგდიდის ბანკის შენობა გათავისუფლებული მძევლების დიდმა ჯგუფმა დატოვა. არსებული მონაცემებით, ამ თავდამსხმელის ტყვეობაში სავარაუოდ 2 მძევალი რჩებოდა, მაგრამ ბოლო წუთებში გაირკვა, რომ გათავისუფლებულია ყველა. არ არის ცნობილი, როგორ მოხდა ეს გათავისუფლება – თავდამსხმელის პირადი გადაწყვეტილებით თუ მოლაპარაკებების შედეგად.

არაოფიციალურად ვრცელდება ინფორმაცია, რომ შესაძლებელია, თავდასმსხმელი უკვე დაკავებულია და იგი ნებით ჩაბარდა სამართალდამცავებს. არიან თვითმხილველები, რომელნიც ამბობენ რომ დაინახეს, როგორ გამოვიდა შენობიდან ხელაწეული პირი პოლიციელთა თანხლებით

ამ წუთებში ერთერთმა მძევალმა ირაკლი კვარაცხელიამ, რომელიც მძარცველის მოთხოვნით ფეისბუქ კომუნიკაციას აწარმოებდა გარესამყაროსთან, თავის ფეისბუგვერდზე დაწერა, რომ მძარცველს ფული გადასცეს, რის შედეგადაც იგი დათანხმდა მძევლების გათავისუფლებას. კვარაცხელია სხვებთან ერთად გამოკითხვაზეა გადაყვანილი.

რაც შეეხება მძარცველს, ვრცელდება ვერსაია, რომ იგი ფულიანად, მისთვის მიყვანილი ავტომანქანით, რომელშიც ჩაისვა სამი ადამიანი, ორი მძევალი და სამართალდამცავი, სამხარეო პოლიციის უფროსი, რომელიც მოლაპარაკებას აწარმოებდა, ახლა მის მიერ მითითებული ადგილისკენ მიემართება. სხვა ვერსიით მძარცველი დაკავებულია და პოლიციის სამმართველოში გადაყვანილი.

ყველა ვერსია, რომელიც ვრცელდება, არაოფიციალურია და ურთიერთგამომრიცხავი, ყოველ შემთხვევაში, არავინ სცემს პასუხს კითხვაზე: თუ ნებით ჩაბარდა, რა აზრი ჰქონდა მისგან მძევლების გათავისუფლების სანაცვლოდ ფულის მოთხოვნას ბოლო წუთებშიც კი, და თუ მიუტანეს, წესით იგი უკვე მისთვის უსაფრთხო ადგილისკენ უნდა მიემართებოდეს. რა ნაბიჯები გადაიდგმება ხელისუფლების მხრიდან, თუკი მძარცველს მიეცა შენობის დატოვების საშუალება, უცნობია.

მოსალოდნელია, რომ ოფიციალური განცხადება სპეცოპერაციის შედეგების შესახებ უახლოეს ხანებში გაკეთდება