ქუთაისის ახალ ინფექციურ საავადმყოფოში ოკუპირებული სოხუმიდან კორონავირუსით ინფიცირებული პაციენტი მკურნალობს, რომლის ჯანმრთელობის მდგომარეობა რთულია. როგორც ინფექციურ კლინიკაში On.ge-ს განუცხადეს, 69 წლის კაცს პნევმონია და სუნთქვის უკაკმარისობა აღენიშნება. Covid-19-ით ინფიცირებული პაციენტი ქუთაისის საავადმყოფოში გუშინ 14 სექტემბერს შეიყვანეს.

ოკუპირებული აფხაზეთის დე ფაქტო ჯანდაცვის უწყების ინფორმაციით, 13 სექტემბერს, სოხუმში Covid-19-სგან 84 წლის ქალი გარდაიცვალა. მათივე ცნობით, ინფიცირებული საკუთარ სახლში მკურნალობდა.

14 სექტემბრის მონაცემებით, ოკუპირებულ აფხაზეთში კორონავირუსი კიდევ 18 ადამიანს დაუფიქსირდა. თუმცა, უცნობია, რამდენად ზუსტია ეს მონაცემები, რადგან საქართველოს ცენტრალურ ხელისუფლებას რეგიონიდან ზუსტი ინფორმაცია არ აქვს. მათივე ცნობით, ამ დროისათვის გუდაუთის საავადმყოფოში Covid-19-ს დიაგნოზით 62 ადამიანი მკურნალობს. 8 მათგანის ჯანმრთელობის მდგომარეობა მძიმეა, 19 პაციენტი საშუალო სირთულისაა, 2 სამკურნალოდ სოჭში გადაიყვანეს.

დე ფაქტო ჯანდაცვის სამინისტროს განმარტებით, ჯამში კორონავირუსი 674 ადამიანს დაუდასტურდა, მათ შორის 186 გამოჯანმრთელდა, გარდაიცვალა — 7.