პაციენტი, რომელსაც სოხუმის საავადმყოფოში კორონავირუსი დაუდასტურდა, გუდაუთის საავადმყოფოსკენ მიმავალ გზაზე გარდაიცვალა, – ამის შესახებ სააგენტო „სპუტნიკი“ ე.წ. ოპერატიულ შტაბზე დაყრდნობით იუწყება.
მათივე ინფორმაციით, 4 სექტემბერს, 74 წლის პაციენტი სოხუმის საავადმყოფოში მძიმე მდგომარეობაში შეიყვანეს. კორონავირუსის დადასტურების შემდეგ კი მისი გუდაუთის საავადმყოფოში გადაყვანის გადაწყვეტილება მიიღეს.
„ტრანსპორტირების დროს პაციენტის მდგომარეობა გაუარესდა და ექიმების მცდელობის მიუხედავად, იგი გუდაუთის ცენტრალური რეგიონალური საავადმყოფოსკენ მიმავალ გზაზე გარდაიცვალა,“ – აღნიშნულია ე.წ. ოპერატიული შტაბის მიერ გავრცელებულ ინფორმაციაში.
დე ფაქტო ხელისუფლების ინფორმაციით, ოკუპირებულ აფხაზეთში, პანდემიის გავრცელების დროიდან, საერთო ჯამში, კორონავირუსის 516 შემთხვევაა დადასტურებული, აქედან გამოჯანმრთელებულია 157 და დაღუპულია 5 ადამიანი.