პარტიაში ,,ევროპული საქართველო” ბიძინა ივანიშვილისა და მისი კანდიდატების სახით გარდუვალი მარცხისკენ მიმავალ პოლიტიკოსებს ხედავენ
როგორც სერგი კაპანაძე ამბობს, ,,ის, თუ როგორი მაჟორიტარები დაასახელა ქართულმა ოცნებამ, სრულიად უცნობი ადამიანები, რომლებიც ასხივებენ პირდაპირ დაღლილობას, ასევე ის, თუ რაზე ისაუბრა ივანიშვილმა, მხოლოდ 9 წელზე, მხოლოდ წარსულზე, კარგად მეტყველებს, თუ როგორი კამპანია ექნება ქართულ ოცნებას, რომ მათ არაფერი აქვთ შესათავაზებელი ხალხისთვის, სიახლეს არ სთავაზობენ და ისევ და ისევ ამ მრავალჯერ გაჭრილი კარტით, ამ 9 წლით აპირებენ ფონს გასვლას, ეს, რა თქმა უნდა, მათ არ გამოუვათ. ეს პრეზენტაცია, ეს გამოსვლები არის პირველი გადადგმული ნაბიჯი მათი გარდაუვალი მარცხისკენ”
ქართული ოცნების მიერ 30 საარჩევნო ოლქში წარდგენილ მაჟორიტარი დეპუტატობის კანდიდატების სიას ეხმაურება ევროპული საქართველოს დეპუტატი ირაკლი აბესაძეც.
,,თამამად შეგვიძლია ვთქვათ, რომ ბიძინა ივანიშვილმა და ქართულმა ოცნებამ უარი თქვეს ცვლილებებზე, უარი თქვეს ქვეყნის უკეთეს მომავალზე და უკეთეს პერსპექტივაზე.
ამიტომ, რა თქმა უნდა, უნდა შევცვალოთ ივანიშვილი და ეს უკვე არსებული გუნდი, რომელმაც ქვეყანაში მოიყვანა სიღარიბე, ეკონომიკური თვალსაზრისით უპერსპექტივობა, ქართულ ოჯახებში უიმედობის განცდა, მოიტანა კრიმინალს დამორჩილებული სამართალდამცავი სისტემა და სერიოზული გამოწვევები საზოგადოებრივი უსაფრთხოების მიმართულებით.
უნდა ავირჩიოთ ახალი გუნდი, ახალი ოპოზიციური ერთობა პარლამენტში, რომელიც რა თქმა უნდა, შეძლებს ქვეყნისთვის ეკონომიკური კეთილდღეობის მოტანას, თითოეული ოჯახისთვის უფრო მეტი დოვლათის შექმნას და სიმდიდრის მოტანას, ქვეყნის დაცვას, როგორც ქვეყნის შიგნით საზოგადოებრივი უსაფრთხოების თვალსაზრისით, ისე საერთაშორისო ასპარეზზე და დეოკუპაციის თვალსაზრისით, რაც რა თქმა უნდა, საქართველოს ნომერ პირველ პრობლემად რჩება” ამბობს ირაკლი აბესაძე.