“ერთადერთი კაცი ვიცი, ვინც ადეიშვილის სადღეგრძელოს სვამდა მაგიდაზე შემდგარი და ეს კაცი იყო იმ 30-ს შორის ერთი — ბექა ოდიშარია”, — ასე გამოეხმაურა ევროპული საქართველოს ლიდერი გიგი უგულავა ქართული ოცნების მაჟორიტარობის კანდიდატად ოდიშარიას წარდგენას. მან სხვა კანდიდატებიც გააკრიტიკა და “მინი ოლიგარქებად” მოიხსენია.
“მე ოთხი თაობის მთაწმინდელი ვარ, მერე?” — ასე ეხმაურება გიგი უგულავა ირაკლი კობახიძის მიერ მთაწმინდის მაჟორიტარობის კანდიდატის, ბექა ოდიშარიას დახასიათებას. ოდიშარიას წარდგენისას კობახიძემ ხაზი გაუსვა, რომ ის “სამი თაობით” მთაწმინდელია.
“ხოხობი არის მრავალი თაობის, სამი თაობის მთაწმინდელობა რას ნიშნავს? კი ბატონო – მე ოთხი თაობის მთაწმინდელი ვარ, მერე? ეს რა სიბნელეა ან რა კომპლექსია” — განაცხადა გიგი უგულავამ.
უგულავამ, ასევე, ყურადღება გაამახვილა იმ მაჟორიტარობის კანდიდატებზე, რომლებიც მოქმედი დეპუტატები არიან, მაგრამ იშვიათად აქტიურობენ:
“ვინმეს გაუგონია ანზორ ბოლქვაძის ხმა პარლამენტში? ვინმეს გაუგონია გოჩა ენუქიჩის ამოღებული ხმა და მისული მიკროფონთან?”
დღეს ქართულმა ოცნებამ მაჟორიტარობის 30 კანდიდატი წარადგინა. კანდიდატებს შორის არიან ოცნების ძველი სახეებიც.