ჩინეთის ჩრდილოეთ რეგიონში, „შიდა მონღოლეთში“ ხელისუფლებამ ეპიდემიური გაფრთხილების შესახებ განაცხადა, მას შემდეგ რაც ადგილობრივი მოქალაქე შავი ჭირით დაავადდა.

შავი ჭირი, რომელიც შუა საუკუნეებში ცნობილი იყო როგორც შავი სიკვდილი, ერთ-ერთი ყველაზე გამანადურებელი დაავადებაა კაცობრიობის ისტორიაში, რომელმაც 100 მილიონი ადამიანი მოკლა მე-14 საუკუნეში.

ჩინეთში დაავადების დადასტურებულმა შემთხვევებმა შეშფოთება გამოიწვია საზოგადოებაში, რომელიც ჯერ კიდევ ებრძვის კორონავირუსით გამოწვეულ პანდემიას მთელი ქვეყნის ტერიტორიაზე.

ჯანმრთელობის ადგილობრივი კომისიის განცხადებით, ქალაქ ბაიან ნურში განგაში გამოცხადდა მას შემდეგ რაც მეცხვარე მამაკაცს ზემოხსენებული დაავადება დაუდგინდა.

ქალაქის მთავრობამ დაუყოვნებლივ გამოაცხადა მთელ ტერიტორიაზე განგაშის მესამე დონე. აღნიშნული ღონისძიება ტარდება მაშინ, როდესაც ქალაქში ფიქსირდება შავი ჭირის 1-იდან 20-მდე დადასტურებული შემთხვევა. ხელისუფლების მთავარი უწყებების დადგენილებით, აიკრძალა ნადირობა და დაწესდა შეზღუდვა ისეთი ცხოველების ჭამაზე, რომლებიც შესაძლოა, შავი ჭირის გადამტანები იყვნენ.

ინფექციონისტები მოუწოდებენ მოსახლეობას, განაცხადონ შავი ჭირის საეჭვო შემთხვევების დროს ან უბრალოდ პაციენტისთვის გაურკვეველი მიზეზებით სიცხის დაფიქსირების დროს.