ევროკავშირის უმაღლესი წარმომადგენელი საგარეო საკითხებში, ევროკომისიის ვიცეპრეზიდენტი ჯოზეფ ბორელი Twitter-ის საკუთარ გვერდზე საქართველოს პარლამენტის მიერ საკონსტიტუციო ცვლილებების პროექტის მესამე მოსმენით მიღებას გამოეხმაურა. მან საქართველოს მიღებული საარჩევნო სისტემის ცვლილება მიულოცა.

“საქართველოს პარლამენტის მიერ საკონსტიტუციო ცვლილებების მიღება არის მნიშვნელოვანი მომენტი ქვეყანაში უფრო მეტი პოლიტიკური პლურალიზმის განვითარებისთვის, მომავალი არჩევნების გათვალისწინებით. გილოცავთ ყველას! ევროკავშირი გააგრძელებს საქართველოს გვერდში დგომას არჩევნების შემდგომ სამზადისში”, – წერს ბორელი.

გუშინ , 29 ივნისს, პარლამენტმა საკონსტიტუციო ცვლილებები მესამე მოსმენით მიიღო. 117 მომხრე, 3 წინააღმდეგი – ასეთი იყო კენჭისყრის შედეგები. რეგისტრაცია 120-მა დეპუტატმა გაიარა. კენჭისყრას ევროპული საქართველო და ერთიანი ნაციონალური მოძრაობა არ დასწრებიან. ისინი გიორგი რურუას გათავისუფლებას ითხოვდნენ, რაც 8 მარტის პოლიტიკური შეთანხმების ნაწილია.