რუსეთის მიერ ოკუპირებულ აფხაზეთში კორონავირუსით ინფიცირების 7 ახალი შემთხვევა დაადასტურეს. დე ფაქტო ხელისუფლების მიერ შექმნილი ოპერატიული შტაბის ინფორმაციით, შვიდივე რუსეთის სამხედრო სასწავლებლის კურსანტია. ისინი მოსკოვიდან 2 ივნისს დაბრუნდნენ.
აფხაზეთის დე ფაქტო მთავრობის მონაცემებით, კორონავირუსით ინფიცირებულთა საერთო რიცხვი 35-მდე გაიზარდა. მათგან 27 უკვე გამოჯანმრთელდა. 1 გარდაიცვალა. ინფიცირებულთა უმეტესობა რუსეთიდან დაბრუნებული კურსანტია.
კორონავირუსით ინფიცირებულთა შორის რუსეთის სამხედრო სასწავლებლების კურსანტები სჭარბობენ ოკუპირებულ ცხინვალის რეგიონშიც. ადგილობრივ დე ფაქტო ხელისუფლებას საერთო ჯამში 45 შემთხვევა აქვს დადასტურებული.