„პლაქვენილთან“ დაკავშირებული განცხადებები ნამდვილად გადაჭარბებული იყო და ამას არასამედიცინო მოტივები ჰქონდა – ამის შესახებ „კოვიდ-19“-ის კლინიკური ჯგუფის ხელმძღვანელმა, თენგიზ ცერცვაძემ საქართველოს პირველი არხის გადაცემა „მოამბეში“ ისაუბრა.

თენგიზ ცერცვაძის თქმით, პრეპარატი “პლაქვენილი” ზოგიერთი კვლევის შედეგად კორონავირუსის სამკურნალოდ ნაკლებად ეფექტურია, თუმცა ზოგიერთი კვლევის შედეგად პირიქით.

„ეს განცხადებები ნამდვილად გადაჭარბებული იყო და ამას არასამედიცინო მოტივები ჰქონდა, ხოლო რაც შეეხება უსაფუძვლობას, შესაძლოა, მთლად უსაფუძვლო არ იყო. იმიტომ, რომ ყველა მედიკამენტს, რომელიც „კოვიდ-19“-ის საწინააღმდეგოდ იცდება, ჰყავს თავისი მომხრე და მოწინააღმდეგე.

ყველას აქვს თავისი ძლიერი და სუსტი მხარეები, მაგრამ ჯერ „კოვიდ 19“-ის სამკურნალოდ აბსოლუტურად ეფექტური მედიკამენტი არ არსებობს. რიგ კვლევებში ყველა მედიკამენტმა და მათ შორის, დღეს ფავორიტად მიჩნეულმა „რემდესივირმაც“ უჩვენა ძალიან კარგი და დამაიმედებელი შედეგი, მაგრამ ზოგიერთ კვლევაში სულაც არ აჩვენა ასეთი კარგი შედეგი და იგივე შეიძლება, ითქვას „პლაქვენილზეც“. მან რიგ კვლევებში კარგი შედეგი აჩვენა, რიგ კვლევებში კი ნაკლები ეფექტი“, – განაცხადა ცერცვაძემ.