პატრიარქმა მრევლს გიორგობის დღესასწაული მიულოცა და აღნიშნა, რომ გიორგობა ეროვნული დღესასწაულია.
„ეს დღესასწაული მუდამ იყო დიდი ეროვნული დღესასწაული საქართველოში, ეს დღე საზეიმოდ აღინიშნებოდა ჩვენს ოჯახში იმიტომ, რომ მამაჩემს ერქვა გიორგი. ამ დღეს ეკლესიიდან გამოჰყავდა მათხოვრები. პირველი მაგიდა იშლებოდა მათხოვრებისათვის. ჩვენ ვსხდებოდით მათხოვრებთან ერთად და აღვნიშნავდით გიორგობას. მეორე მაგიდა უკვე კულტურული ხალხისათვის. დიდი ზეიმი იყო, დიდი იმედი იყო. წმინდა გიორგის დღესასწაული იმედის დღესასწაულია.
წმინდა გიორგიმ, როცა აწამებდნენ მას, წარმოთქვა სიტყვა: „ღმერთო ჩემო, ღმერთო ჩემო რასათვის დამიტევებ მე“. ხმა მოესმა გიორგის „ნუ გეშინია გიორგი, მე შენთანა ვარ“, ეს მაცხოვრის სიტყვებია. ეს უნდა გვახსოვდეს ჩვენ, რომ ამ გაჭირვების დროს, როცა მთელ მსოფლიოს უჭირს, ჩვენ გვესმის ხმა მაცხოვრისა: „ნუ გეშინიათ, მე თქვენთანა ვარ“, – ბრძანა პატრიარქმა.
“მსოფლიო განიცდის იმას, რაც ხდება მსოფლიოში.
მე მატყობინებენ, რომ ზოგიერთ ქვეყანაში ტაძრები, მონასტრები დაკეტილია და ხალხი იძულებულია წავიდეს სოფლებში და იქ ილოცოს, იქ დაესწროს წირვას. ჩვენ თავისუფლად ვართ აქ, დიდება და მადლობა უფალს მისი დიდი წყალობისთვის.
თქვენ როგორ ფიქრობთ, ეს სასჯელია თუ გაფრთხილება? ეს არის გაფრთხილება. ეს არის მოქცევა. ჩვენ ვმადლობთ უფალს, რომ უფალი განიცდის ჩვენთან ერთად.
ღმერთმა ძალა მოგცეთ, ღმერთმა ინებოს, რომ ჩვენი მწუხარება სიხარულად გადაიქცეს.”-თქვა საქართველოს კათოლიკოს პატრიარქმა, ილია მეორემ, სამების ტაძარში ქადაქებისას გუშინ 6 მაისს