ზუგდიდის ინფექციური საავადმყოფოს ლაბორატორიაში  გუშინ 25 ადამიანის ბიოლოგიური მასალა COVID 19-ზე  გამოიკვლიეს. ყველა შემოწმებულ ტესტზე პასუხი უარყოფითი იყო.

 25 შემოწმებული პაციენტიდან 8 სამედიცინო პერსონალია. დანარჩენები კი ცხელების ცენტრებსა და საკარანტინო სივრცეში მყოფი ადამიანები – აცხადებენ ზუგდიდის ინფექციურ საავადმყოფოში. საავადმყოფოს ლაბორატორიული მიმართულების ხელმძღვანელის, ლელა ქაჯაიას განცხადებით, 1-ლი  მაისიდან  ლაბორატორია სრული დატვირთვით იმუშავებს.

“უკვე ზეგიდან ჩვენ სრული დატვირთვით ვიმუშავებთ, რადგან მივიღებთ ჩინეთიდან გამოგზავნილ რეაქტივებს, რაც საშუალებას მოგვცემს უფრო მეტ ადამიანს ჩავუტაროთ ტესტირება. ექიმების შემდეგ PCR ტესტირება ჩაუტარდებათ სამხედრო მოსამსახურეებს, პოლიციელებსა და რეგიონში მომუშავე ჟურნალისტებს” – ამბობს ლელა ქაჯაია.

დღევანდელი მონაცემებით, საქართველოში კორონავირუსით ინფიცირების შემთხვევათა რაოდენობა 22-ით გაიზარდა და 539 გახდა. საიდანაც  178  გამოჯანმრთელებულია, ხოლო 6 გარდაცვლილი . ამასთან,  უცხოეთიდან სამკურნალოდ გადმოყვანილია საქართველოს  3 მოქალაქე.