“გუშინ მილიარდერის წარმომადგენელმა, ბატონმა გიორგი გახარიამ, ყველა ვერ მოატყუა, იმიტომ, რომ ძალიან ბევრი საზოგადოებრივი ფენა და კატეგორია, რომელიც დახმარების მოლოდინშია, არც კი უხსენებია, სათვალავშიც კი არ ჩააგდო, შესაბამისად ვერც მოატყუებდა. ესაა ენით აღუწერელი კადნიერება, რაც გახარიამ გუშინ საზოგადოების ძალიან დიდ ნაწილს აკადრა.

გუშინ გახარია  საუბრობდა ციფრებზე, პროცენტებზე, შავი გაასაღა თეთრად… თურმე არ ჰქონია ამ ყველაფერზე საუბრის საფუძველი. არ ჰქონდა, არ აქვს და კიდევ ერთი თვე მინიმუმ არ ექნება ბიუჯეტი. საგანგებო ბიუჯეტი არ არის. არ არსებობს 3 მილიარდ 500 მილიონი ლარი – არ არსებობს, ხალხო.

გუშინდელი პრეზენტაცია თავიდან ბოლომდე იყო პროპაგანდა და რამდენიმე დღით თავიანთი ნაკლოვანების გადაფარვას ემსახურებოდა. ეს ნიშნავს, რომ დახმარებას მაისის ბოლომდე ვერავინ მიიღებს.

სოფლის მცხოვრებლებზე, სადაც მილიონზე მეტი ადამიანი ცხოვრობს, არცერთი სიტყვა არ უთქვამთ გუშინ. ამოშალეს საერთოდ. არადა როგორც არასდროს, ისე სჭირდებათ მათ ახლა დახმარება.

რაც შეეხება თვითდასაქმებულებს, პრემიერმა თქვა, რომ ისინი მიიღებენ 4-ჯერ ნაკლებ დახმარებას, ვიდრე დასაქმებულები. მათ თქვეს, რომ 840 ათასი თვითდასაქმებულისთვის 75 მილიონი ლარი გამოყვეს, სინამდვილეში კი ეს თანხა მხოლოდ 240 ათასი თვითდასაქმებულისთვისაა საკმარისი. ამის გამოთვლა მარტივია – გადაამრავლეთ 240 ათასი 300 ლარზე.

არცერთი სიტყვა არ თქმულა სტუდენტებზე, დაბრუნებულ ემიგრანტებსა და დევნილებზე.

ხელისუფლებას არ აქვს არანაირი ბიუჯეტი. ამიტომ, მოგმართავთ ხელისუფლებას, შემოიტანეთ პარლამენტში ბიუჯეტი დასამტკიცებლად თუ ამის თავი გაქვთ”, – განაცხადა მელიამ მმართველი გუნდის მიერ წარდგენილ ანტიკრიზისულ გეგმაზე, რომელიც საზოგადოებას პრემიერმინისტრმა, გიორგი გახარიამ, გუშინ, 24 აპრილს, წარუდგინა. ამ გეგმის ჯამური ღირებულება 3.5 მილიარდ ლარს აღწევს.