ევროპული საქართველოს ლიდერი გიგა ბოკერია მთავრობის მიერ წარდგენილ სოციალურ-ეკონომიკურ გეგმას კრიტიკულად აფასებს და მას არაადეკვატურს უწოდებს:

“დაგვიანებული, ზედაპირული, მავნებლური ინსტიქტებით და არაადეკვატური კრიტერიუმებით სავსე ბუნდოვანი პრეზენტაცია მოვისმინეთ გახარიასგან. არ ხდება გადასახადების რეალურად დაწევა, არ ხდება წნეხის შემცირება მოქალაქეებისთვის, მეწარმეებისთვის, რაც ამ ვითარებაში წარმოუდგენელი რამეა. არ ხდება დერეგულირება, ისევ ინარჩუნებენ მთავრობის როლს, რომ არჩევანი გააკეთონ, ვის რა მისცენ, თითქოს მათ უკეთ იციან, ჩვენ ჩვენს ფულს როგორ დავხარჯავთ, რაც კორუფციის რისკიც არის და მავნებლობაა ყველა შემთხვევაში და საპენსიო შენატანზე, ფულზე, რომელიც ეკუთვნის ხალხს, ისევ უარს ეუბნებიან, რომ შანსი ჰქონდეთ ამ გაჭირვების დროს გამოიყენონ და ამ გადასახდს არც კი აჩერებენ”, – ამბობს ბოკერია.

მისივე თქმით, შეზღუდვების შემსუბუქების კუთხითაც ნელი ტემპი და არამკაფიო კრიტერიუმებია.

“უფრო ჩქარა უნდა გავაკეთოთ ეს ყველაფერი და უფრო მკაფიო კრიტერიუმებით. უნდა გამოირიცხოს აბსურდული შეზღუდვები, რომ ცოლის გვერდით ჯდომისთვის სამი ათასი ლარით დააჯარიმეს ადამიანი და ბავშვებს ვერ ისვამენ უკან ოჯახის წევრები და უნდა გამოირიცხოს სუფთა სახლისნაირი ვითარებები და ამაზეც მკაფიო ვერანაირი პასუხი ვერ გავიგეთ. ამ ტემპით ჩვენ კონკურენციაში ვერ მოვიგებთ და ძალიან დიდი იქნება ზიანი ყველასთვის” – ამბობს ბოკერია.